ଆମ ପରିବେଶରେ ଅନେକ ପ୍ରକାରର ଉଦ୍ଭିଦ, ପଶୁ, ପକ୍ଷୀ ଏବଂ କୀଟପତଙ୍ଗ ବାସ କରନ୍ତି। ଆମେ ସମସ୍ତେ ପରସ୍ପର ସହିତ ମିଳିମିଶି ରହିଥାଉ ଏବଂ ପରସ୍ପର ଉପରେ ନିର୍ଭର କରି ବଞ୍ଚିଥାଉ।
ଗଛଲତା ଆମ ଜୀବନ ପାଇଁ ଅତ୍ୟନ୍ତ ଆବଶ୍ୟକ। ଗଛରୁ ଆମେ ଖାଇବା ପାଇଁ ମିଠା ଫଳ, ପନିପରିବା, ଔଷଧ, ପିନ୍ଧିବା ପାଇଁ ସୂତା, ଘର ତିଆରି ପାଇଁ କାଠ ଏବଂ ନିଶ୍ୱାସ ନେବା ପାଇଁ ନିର୍ମଳ ବାୟୁ ପାଇଥାଉ। ଏହା ସହିତ ଗଛର ଥଣ୍ଡା ଛାଇ ଆମକୁ ଶାନ୍ତି ଦିଏ ଏବଂ ଏହା ଅନେକ ପଶୁପକ୍ଷୀଙ୍କର ବାସସ୍ଥାନ ମଧ୍ୟ ହୋଇଥାଏ। ସେହିପରି ଗାଈ, ମଇଁଷି ଓ ଛେଳି ପରି ପୋଷା ଜୀବମାନେ ଆମକୁ କ୍ଷୀର ଦିଅନ୍ତି। ତେଣୁ ଆମେ ଏହି ଜୀବଜନ୍ତୁ ଓ ଗଛଲତାଙ୍କୁ ସ୍ନେହ, ଯତ୍ନ, ଖାଦ୍ୟ ଓ ସୁରକ୍ଷା ଦେବା ଉଚିତ।
ପ୍ରାଣୀ ଓ ଉଦ୍ଭିଦ ପରସ୍ପରକୁ ବହୁତ ସାହାଯ୍ୟ କରନ୍ତି। ପକ୍ଷୀ ଓ ମାଙ୍କଡ଼ ପରି ଜୀବମାନେ ଫଳ ଖାଇ ଟାକୁଆ ବା ମଞ୍ଜି ଏଣେତେଣେ ପକାଇ ଦିଅନ୍ତି। ଗୁଣ୍ଡୁଚି ମୂଷା ମଧ୍ୟ ମଞ୍ଜିକୁ ମାଟି ତଳେ ପୋତି ଭୁଲିଯାଏ। ପରେ ସେହି ମଞ୍ଜିରୁ ନୂଆ ଗଛ ଜନ୍ମ ନିଏ। ଏହା ବ୍ୟତୀତ ପ୍ରାଣୀମାନଙ୍କ ବର୍ଜ୍ୟବସ୍ତୁ ମାଟିକୁ ଉର୍ବର କରେ, ଯାହା ଗଛ ବଢ଼ିବାରେ ସାହାଯ୍ୟ କରିଥାଏ। ଏହିପରି ଭାବରେ ପ୍ରକୃତିର ସନ୍ତୁଳନ ବଜାୟ ରହେ। ଯଦି ଆମେ କୌଣସି ପଶୁପକ୍ଷୀଙ୍କୁ ଭୟ କରୁ କିମ୍ବା ପସନ୍ଦ ନ କରୁ, ତଥାପି ସେମାନଙ୍କୁ ଆଘାତ ଦେବା ଉଚିତ ନୁହେଁ।
ଆମ ରାଜ୍ୟ ଓଡ଼ିଶାର ପ୍ରସିଦ୍ଧ ଚିଲିକା ହ୍ରଦ ଏବଂ ଏହାର ମଙ୍ଗଳାଯୋଡ଼ି ଓ ନଳବଣ ଅଞ୍ଚଳ ପ୍ରକୃତିର ଏକ ସୁନ୍ଦର ଉଦାହରଣ। ଶୀତ ଋତୁରେ ସାଇବେରିଆ, ଇରାନ, ଇରାକ ଏବଂ ହିମାଳୟ ଭଳି ଦୂର ସ୍ଥାନରୁ ହଜାର ହଜାର କିଲୋମିଟର ଉଡ଼ି ଉତ୍ତର ପିଣ୍ଟେଲ, ପେଲିକାନ ଓ ଗ୍ରେଟର ଫ୍ଲେମିଙ୍ଗୋ ଭଳି ଲକ୍ଷ ଲକ୍ଷ ବିଦେଶୀ ପକ୍ଷୀ ଖାଦ୍ୟ ଓ ଆଶ୍ରୟ ପାଇଁ ଏଠାକୁ ଆସନ୍ତି। ଏଠାରେ ପ୍ରକୃତି ଓ ମଣିଷ ପରସ୍ପର ସହ ସ୍ନେହରେ ଏକାଠି ବଞ୍ଚିବାର ଏକ ସୁନ୍ଦର ନିଦର୍ଶନ ଦେଖିବାକୁ ମିଳେ।